رمضان كريم

-  ماما؟
* أيوه .
- إنتي عارفة أنا بحبك قد إيه؟
* عارفة يا زِيود
- لأ مش عارفة.
* بتحبني قد إيه؟
- بحبك قد كل الفوانيس ...

كوكب تاني

- ماما؟
* ايوه يا زو
- إحنا بقى لنا كتير في العالم ده... أنا عاوز أروح الفضاء
* تروح فين؟؟
- أروح الفضاء ...أنا زهقت من العالم ده!
* عاوز تروح فين في الفضاء .. النجوم؟
- عاوز أروح كوكب تاني... 

حواديت

ابتزاز

شجار عنيف ... ينزوي زياد جانيا مع الحرص على ان اسمع كل ما يقول
- رب موتني بقى
= طناش
- باقول لك موتني بقى
-= طناش
- انا هاموت
= طناش
- انا هاموووووووووووووووت جدا
= طناش
- يا رب موتني بقى
باقول لك موتني ... هاتموتنى ولا هاضربك؟
انا هاموت جدا ... بصوت اعلى انا هاموووووووووووووووت جدا جدا
صمت يحلق
بصوت اقل حدة - تقريبا عتاب

-فيش بعد الشر عليك؟؟؟
=(ضحك وأصالحه ).. انت اكبر مبتز في التاريخ
- ماما انا بحبيكي
= وانا كمان يا زو بس لازم تسمع الكلام
- وانتي كمان لازم تسمعي الكلام!!!


شاطر

اودعه للمدرسة
= يلا سلام ... خليك شاطر وعاقل بقى
- وانتي كمان ... خليكي شاطرة وعاقلة مع بابا!

زواج

= نور .. لما تكبر بقى يا حبيبي .. عاوزة افرح بيك .. تتجوز بقى وتخلف ... عاوزة احفاد .. فاهم
* لا انا مش هاجوز
= ناااااااااااااااااااااااعم؟؟؟
* انا مش عاوز زن عاوز ابقى براحتي... مش عاوز اتجوز
= هاتتجوز غصبن عنك .. هو بمزاجك؟؟؟ امال انا باتعب واخلف واربي عشان سيادتك تقولي  في الاخر مش هاجوز؟؟!!!!
*(يبتسم فيما معناه بياخدني على قد عقلي)... انا مش عاوز اتجوز يا ماما
= هاتجوز بس طبعا مش دلوقتي لما يبقى عندك 18 ولا حتى 20 سنة عشان الحق
* طيب ممكن اختار
= هتجوز مصرية وانسى آني وآندريا بتوعك دول

احتد النقاش واذ فجأةً نسمع صياح
- انا عاوز اجوز يا ماما... انا هاجوز سارة .. انا بحبها
= ؟؟!!!!!!!!!!!!

-ها ... انا هاجوز امتى؟؟؟


حلم

- ماما ؟
= ها يا زو
- انتي عارفة ..انا لما بقفل عيني باحلم
= وايه كمان
-(ابتسامة حلوة) ... بس كده!!

خواطر عما حدث...

الصمت في الوقت الحالي لا يجوز ..
أو ان الزخم القوي لاحداث دامت 18 يوماً ... يدفعنا لكل شىء ممكن للكلام، للضحك، للخوف، للكتابة، للفرحة والترقب والحلم ، للشك... لاي شيء عدا الصمت والإنزواء... لذلك لا يجوز الصمت
ربما اعلق على بعض النقاط في هذا البوست او في عدة بوستات لا أعرف سأرى ما يقودني إليه الحدث!!
في يوم 25 يناير شعرت أنه أمر كبير بمعنى أن المظاهرة ستكون كبيرة لان التجمعات والدعوات لها منتشرة .. لكني كنت خائفة من تعامل الأمن عالعادة معها وهو أمر معتاد منذ فتر بمصر الإحتجاجات والاضرابات والشكوى العقيمة والرد الصلف .. كنت


أتابع الجرائد الالكترونية وانظر لأكثرها تعليقاً واجدها عادة خناقات مرتضى وشوبير وتصريحات الفنانات والكورة ومقالات الوقيعة الدينية والخ الخ ... ولأنني على اي حال بالخارج ... كنت أترقب
ثم مرت الايام... اليوم تلو الاخر بمنتهى الثقل والزخم والرعب والامل والارهاق ايضاً... كنا ننام بشكل سيء للغاية وخصوصا زوجي بنام 3 ساعات او اقل يوميا نقلب كل المحطات الجزيرة العربية والجرائد اليوم السابع الحياة الشرق الاوسط الشروق مصراوي الخ الخ
زوجي باحث في العلوم السياسية .. وتوقع من اليوم الاول أن مبارك لن يستسلم ويهرب مثل ابن على لانه رجل جيش له شرفه العسكري ومعاتد وتوقع اموراً اخرى كثيرة ايضاً معظمها تحقق ولديه توقعات بأخرى ادعو الله الا تتحقق!!
لكن الامر الواقع الذي نمسك بخيوطه أن هؤلاء الشباب الذين لا يمتلكون الا الحماس والعناد والرغبة في رفع الرأس والعزيمة وهي امور لا تحتاج الى تذكير قد استطاعوا ان يلفوا حولهم القلوب والعزائم المعطلة وانتفضت مصر أخيراً بعد صبر ومراوغة وتحايل وسقط النظام...
30 عاما من الركود تبعها 18 يوماً من الزخم غير العادي المرعب المحير المربك السلمي ...المدهش!!!

توقفت كثيراً أمام مشهد المصريين وهم يصنعون من ميدان التحرير مدينة فاضلة جديدة جديرة بهم بل يسحبون كل مخزونهم الثقافي والحضاري ليعيدوا بناء الانسانية الاولى والعالم من جديد... وهذا يسوقنا لإعادة النظر في ثوابتنا الفكرية وايقوناتنا الثقافية المستوردة واسمحوا لي أن العن ابو يوتوبيا الغرب .. لدينا هنا ومن اعماق ثقافتنا المعجونة بطين النيل وأيدي الفلاحين الخشنة وعزائم الشباب المطعون سابقاً في رجولته مثالا يضرب عم أفلاطون بالجزمة لأنه نموذج تحقق في لحظة عدم استقرار وعنف وتوتر قومي!!!والأهم ان مدينة افلاطون لم تتحقق مطلقا!!!
الثورة عادة بها ثائرون وافقون غاضبون مناورون يهزون نظاماً ويسعون لسقوطه يكرون ويفرون ولكن المدهش أن المصريين امتلكوا مع كل ذلك الوقت للرسوخ والبناء والإستقرار والغناء والامن والنكات والأمل والتأمين والنوم تحت جنازير الدبابات مع الحرص على عبوات الشاي اللبتون بين جنزير الدبابة!! وهو أمر مدهش وملهم ومحير لم أفق من زخمه بعد... لم أهضمه بعد...


كيف يتوافق مفهوم الثورة مع مفهوم الاستقرار؟؟؟ وهذا الوعي غير العادي بسلمية الثورة - ولو خرج البعض عنها لما اعترض أحد لانها ثورة على اي حال- ثم يسوق المصريون أولادهم وعائلتهم للمكوث والصمود ..... هل هي استهانة بالموقف أو عدم فهم أو هي الطبيعة المصرية التي تعشق الاستقرار وهو منتهى مناها؟؟؟ لقد سمحت لنفسي ان اطلق لفظ فرح على الثورة بالتحرير الناس رايحة فرح مش مظاهرة
هذ أكثر شيء ألهمني ويدعوني وادعوكم معه للتفكر في ها الشعب العجيب صاحب الموروث الضخم
الأمر الأخر الذي اود ان اتحدث عنه هو ان عزيمة الشباب وصمودهم وعنادهم وهم يرون اصدقائهم يموتون في واقعية لا شبهة فيها للعالم الافتراضي المتخيل صدمهم وجعلهم اكثر اصراراً على المضي قدما ... وبالعكس مدى ترهل النظام وغياب الرؤية عنه في استيعاب الموقف والبطء غير العادي في ردة الفعل كأن الامر لا يتعلق بدولة كبيرة مثل مصر هذا الامر الذي لا يقلل من ثورة الشباب فضح مدى انعزال الرئيس عن الاحداث ومدى الترهل والرخو الذي تعاني منه الدولة بمؤساساتها المختلفة
لم أتخيل أن يوم 25 وما تبعه من أيام ستسقط النظام ... كنت أشفق على الاولاد لانني أم .. ويؤلمني جدا لدرجة مزعجة فعلاً تدفعني للبكاء الفوري أي احداث تحدث للأولاد أفكر في الامهات الاتي ربين واحببن وأفنين اعمارهن من أجل الاولاد وأمور أخرى
لكني انظر في وجوه هؤلاء الشهداء ولا أجد ذلك الالم داخلي بل على العكس اشعرهم أجمل وأنضر ووجوههم تنضح بفخار ما وحب وحياة وهو أمر يحيرني فعلاً وأجدني سعيدة مطمئنة...
السعادة والاطمئنان والفرحة مشاعر جديدة على من يهتم بالشان العام ...ومن المؤكد ان الايمان بالارادة بات اقوى إيمان..


لذلك وحتى بوست اخر أطرح فيه خواطر اخرى احيي كل هؤلاء الشباب اللي زي الورد وأفخر بهم وأدعو لأمهاتهم بالصبر وأظن انهن صابرات.. وأحيي كل الاولاد العفاريت الشرفاء اللي عملوها وأجدد فخري بهذا الشعب الملهم المراوغ اللي لا يستطيع هضمه اي من كان وذلك لحسن الحظ والحمد لله لذلك...و يبدو من التواضع عدم محاولة تأطير هذا الشعب في اطارات وقوالب عقيمة مدعّية الشعب ده يا جدعان موش سهل وأيمانات المؤمنين من كل ملة موش سهل...

تصورات ليوم مشرق

ليل النحيب الطويل يسفر عادة عن صباح مشرق وإن لم تخرج الشمس...

أنهض بينما تستعد الشمس في الجزء البعيد من الارض لغروب ويستعد أخرون لليلة أخرى في عراء الاحتمالات 

لن أتسمر اليوم أمام شاشات تخوخني

سأفتح ستائري وان اختفت الشمس، سأنفض التراب عن البيت، سأغير الشراشف وأمسح الأرض ... سألمّع ... بحماسة
سأصنع طعاماً لذيذاً فخماً ودسماً لأولادي... سأطعمهم بيدي العارية
ربما أقرأ ، ربما أغني ... ربما أطوي الغسيل... لن أنظر للثلج المتساقط بلا رحمة...

سأحمم ولديّ... سأمشط شعرهما بتمهل .... سأستحم ... وأمشط شعري ... بتمهل ...أملك الوقت
سأدعو الجميع للسرير... أراوغ بدفئهم ليلاً يهجم...
سأمسح على شعر ولديّ وأنا أتذكر من لم يمسح أحد على شعورهم
سأربت على ظهرهما "نام .. نام ... يا حبيبي نام" سأتذكر من لم يربت أحد على ظهورهم
سأغطيهما بشراشف نظيفة... عطرة... وأتذكر من ينامون في رحم الارض الطيب

لن أغلق عيني وأتذكر " رصاصات " لن اتذكر " احماااااااااااااااااااااااااااااااااد"  أخي اسمه أحمد، عمي اسمه أحمد ، خالي اسمه السيد أحمد،أبي اسمه محمد ، أولاد أبناء عمومتي فيهم أحمد ، وغرباء كُثر اسمهم أحمد....
أحمد ، محمد ، مايكل ، ديفيد.... تتقبلهم الارض بلا تأفف... بعدالة مطلقة.... لا يوجد بالارض ظلم .... فقط ظلمة
الأرض تتقبل أيضاً الدماء ...تتقبلها بلا غضاضة...

سألتحف جيداُ ضد البرد ... وبينما يدخل ليلي ....تستعد الشمس للسطوع على يوم آخر من الاحتمالات ...
ليل النحيب لا يؤدي قطعاً إلى مزيد من النحيب...

الوان

* ماما
- أيوه يا زو
*على فكرة أنا بحبيييكي
- وأنا باموت فييكي
* انتي قلبك أبيض زي الفلة
- ههههه... والله أنت عسل يا زو وقلبك أبيض زي الياسمين
* لا أنا قلبي اسود شوية
- ليه؟؟
*عشان ضربت نور
- لا خلاص الموضوع ده خلص..
* أنا قلبي شوية إسود وشوية أبيض ..... كل الناس قلبها شوية إسود وشوية أبيض
- طب ونور؟
* نور... قلبه الــــوان

طفل

-ماما؟
*ايوه
-انتي عارفة إن أنا طفل؟
*(التفات وضحك) ايه؟
-(كسوف)
*طب يعني ايه طفل؟
-مس هاقولك
*ليه؟
-هتضحكي عليا
*(بجد جد جداً) لا لا وعد
-طفل يعني ولد صغير (بأسف)
*مين اللي قالك
-انا اللي قلت لنفسي.... بعدين هاكبر بقى.... وأنتي هتموتي (بداية نحيب) وأنا هازعل عليكي
*لا يا حبيبي مش هاموت دلوقتي متخافش
-امتى هتموتي؟
*لما شعري كله يبقى أبيض جدا
-(تفكير) زي تيته؟
*لا تيتة لسه عندها شوية شعر اسود
-لسه مس هتموتوا دلوقتي؟
*اه يا حبيبي
-عسان أنا بحبـــييكي ومس عايزك تموتي دلوقتي
*وانا كمان باموت فيك يا زيزو ....متخافش أنا مش هاسيبك

بوسة وحضن دفوني