حب

-ماما!
=أيوه يا زٍيد
-الجاكت ده حلو عليا؟
=عسول يا زيدو 
-(يبتسم)عشان سارة (صاحبته) تلاقيني حلو كده 
......................


(عائداً من المدرسة مبوز)
=ايه؟؟
(بكل الاطة يستنى لما ندخل البيت ويفتح في البكاء)
=ايه يا زيزو؟؟
-سارة!
=مالها؟؟
-هتسافر المغرب 
=هتسافر خالص ماعدتش هترجع؟؟
-هتسافر اسبوعين :(
=عادي يا زيزو هي راحت تشوف تيتتها وجدها وهترجع تاني.
-بس اسبوعين كتير وهي هتوحشني :(
لا اسبوعين دول هيفوتوا بسرعة متخافش.
(يطمئن بس يفضل مبوّز)
........................................


(الشنطة مليانة اوراق ورسومات وما يشبه الخطابات وقص ولزق)
=ايه يا زو كل الجوابات دي؟؟
-دي جوابات كتبتها لسارة 
=هو انت مبتعملش حاجة في المدرسة الا الكتابة لسارة؟؟
-اه ،(يبتسم) عشان لما ترجع من السفر اديها كل الجوابات دي :)
......................................
ماسكاً بخاتم لي
- ماما؟
= ايون
- ايه رأيك الخاتم ده هيبقى حلو لسارة؟
= ؟؟؟؟!!!!! بس ده بتاعي !!
- مش مشكلة يا ماما
= ايه ده هتاخد حاجة ماما وتديها لسارة بتاعتك؟؟
- (يشعر بالورطة) لأ خلاص ، هارسم لها رسمة أحسن.
= طيب وانا مش هترسم لي حاجة؟؟
- هارسم لك بيت .... بمدخنة كمان :)