السبت، 24 مايو 2008

التاج ..

وصلني "تاج" من العزيزة سالي .. وهو اول تاج يصلني منذ بدأت التدوين في اكتوبر الماضي...
ومن الواضح للعيان ان التاج من الاهمية بمكان حتى ان التدوين لا يستيقم الا باستقباله مرة واحدة على الاقل في الحياة..
وكي اكون صادقة وكي لا ابدو ك "محدثي النعمة" فانا لا اعرف يعني ايه تاج وما هي اهميته القصوى التي معها يستقبل التاج استقبال الفاتحين ايام زمان.. وفضلت ان ابان غير مطلعة من ان اكون عبيطة .. المهم بقى يا جماعة نبدا الفضايح.. اقصد اسئلة التاج..وهي - ولله الحمد - 4 فقط لا غير..
1- اذكر 5 احلام على الاقل تخص ماضيك وتحلم فيها بتغير الاشياء .. ماذا ستعدل وماذا ستترك؟؟
5 احلام .. كتير قوي!! الحقيقة انا عمري ما حلمت احلام طويلة الاجل .. اساسا المستقبل اكتشفته فجأة لما نور اتولد.. واترعبت ساعتها .. ولا ادعي انني حلمت احلاماً غيرت الدنيا .. بس فاكرة حلم كان نفسي قوي قوي فيه : اسافر السودان وكنت خلاص جهزت نفسي واتفقت مع صديقة سويسرية عسل كانت هتيجي معايا ونعمل كتاب مشترك عن انطباعتنا عن الرحلة.. وبدأنا نجمع معلومات ونحاول تدبير المصاريف...الخ الموضوع ده من يجي 10 سنين بس بقى اللي حصل ان صاحبتي سابت جوزها المصري وسافرت سويسرا ووقف المشروع لهذا السبب ولعدة اسباب اخرى
حلم تاني : اعيش في القاهرة لوحدي في "استديو" يعني اوضة بمنافعها واشتغل وأكون نفسي أو الاقيها بس .. لوحدي تماما.. الخ بس اللي حصل انني حبيت الراجل اللي قلت له على الحلم ده لما كنا مجرد اصدقاء واتجوزته وعيشت معاه ومع عائلة زوجي الكبيرة جدا والجميلة جدا والحميمة جدا واتملت حياتي حواديت لأول مرة..
حلم تالت: كان نفسي يبقى لي جدة بجد زي ما الكتاب بيقول.. بس ما حصلش رغم انني كان عندي 4 جدات ماتت اخرهم من حوالي 5 سنين .. يمكن انا اللي ما عرفتيش افك الشفرة؟؟ اكيد .. اصلي كنت براوّية قوي قوي قوي .. واللي حصل ان حماتي هي تقريبا اللي ملت الدور ده .. أنا باحبها لأسباب مختلفة عن كونها حماتي وقريبة وصديقة ومحبة بجد .. باحبها لانها انسانه كما ينبغي للانسان ان يكون .. اكتر انسان قابلته مدهش..
حلم رابع: وانا صغيرة كان نفسي قوي قوي اروح لأخر الشارع الكبير واشوف فيه ايه .. وكمان اروح لأخر الافق ..في المكان اللي السما بتلمس فيه الارض .. كنت متخيلة ان المكان ده مش بعيد .. وكان عندي يقين انه موجود واني هاركن على السما الزرقا في قعدتي على الارض!!!
حلم خامس:كان حلمي اسافرفرنسا .. وسافرت فرنسا وانا عندي 19 سنة عود اخضر كلي تفاؤل وحب وتصديق للبلد واللي فيها ..وحدثت لي صدمة حضارية مروعة..اكتشفت ان فرنسا فيها شوارع عادي ..واتوبيسات عادي ..وانهم بني ادمييييييييين عادي ... وإنني مضحوك عليا ..فضلت اعاني من الاكتئاب الحاد خمس ست سنين بجد..بعدها اكتئاب متأرجح.. لحد ما نور اتولد .. بعدها ما عدش عندي وقت للإكتئاب...
"المورال" هي انه مش كل حاجة تتمناها تبقى حلوة ومش كل حاجة تحصل تبقى وحشة ..!!!
--
2- اذكر5 احلام على الاقل تخص مستقبلك..
اول حلم يخص اولادي .. ان ربنا يديم عليهم الصحة والبركة ويجعلهم دايما قرة عين لنا ..
تاني حلم.. اقابل فعلا نفسي .. الاقيها .. انا بدأت رويدا رويدا الاقيها.. وبدأت اشعر براحة للي وصلت له .. بخصوص الحياة والناس ... بس لسه عايزة اشوفها بوضوح .. بدون اي خديعة .. بمنتهى التجرد... لسه الشمس هتطلع..
تالت حلم : عايزة ما يجنيش اكتئاب تاني ... نهائياً!!
رابع حلم: اعلم اولادي كويس .. انهم يكونوا انفسهم بجد .. يكونوا سعداء في اختيارتهم .. يكونوا اوفياء للحياة واقوى من اختباراتها الصعبة...
خامس حلم: نقضي فترة الشيخوخة انا ورفيق الدرب في الاسكندرية.. في بيت قديم سقف عالي قريب من مطعم ايليت...
--
3- اذكر شخصين على الاقل متواجدين في حياتك حاليا كنت تود وجودهم قبل الأن بزمن..
اممممممممم
حماتي .. لشجاعتها وحواديتها وعطاءها
مدونتي لانها تربطني ربطاً بالعالم الذي احبه...
--
4- اذكر شخصين على الاقل غير متواجدين في حياتك حالياً كنت تود وجودهم الآن أو في حياة اولادك مستقبلاً..
ابي .. رحمة الله عليه .. كنت اتمنى ان أعوضه أمورا كثيرة وأعتذر له عن أمور أخرى وأن يحضر فرحي وأن يرى أولادي ويلعب معهم ...
قريب من البرازيل .. يموت ويترك لنا ثروة هائلة وطبعا الجنسية البرازيلية!!!!
بس كفاية كده .. على فكرة انا نفسي مندهشة من الاجابات .. اتاري التاج ده حاجة جميلة والله .. وقفة مع النفس البشرية المتشابكة..
المهم انا بقى امرر هذا التاج الى.. مع حفظ الالقاب.:
فاطيما
محمد صبحي
نور سيبك انت
ايما ام البنين
سومة-87
مهرة الحرافيش..
ولأي حد عايز تاج يا جماعة..

هناك 16 تعليقًا:

m.sobhy1990@gmail.com يقول...

التاج ده تقيل

بس إجاباتك أدهشتنى بجد

بس برضه ليا عتب عليكى

باختيارك ليا علشان أرد ع التاج

هيبقى فيه بلاوى ف إجاباتى

هتبقى تدبيسة جديدة


عموما شكرا على إختيارى

Zianour يقول...

انا مبسوطة اني ادهشتك !!!
طب انا مرضيتش اقول كل حاجة.ز انا ساعات باندهش من حجم ما مررت به.. لن ادعي انني شهيدة على اي حال!!
انا راضية -لحد ما - عما رايته وعشته
لما نشوف هتقول ايه لما يبقى عندك 33 سنة(ونص)!!!
يلا بقى ولو مش عايز التاج بلااااااش ( وهذا يذكرني بمثل شعبي - وهي لحظة مناسبة للامثال الشعبية- عيني فيه واقول اخيه.. طبعا المثل لا ينطبق عليك .ز هي بس القافية حكمت..(:)
بالنسبة للقصيدة في الورد برس... ايوه افتكر جدا خالص .. وقريب قوي كمان!!!
الوطن هو ما يعيش بداخلنا وما نكونه من انتصارات خاصة..
وبعدين لو سبناها .. هي هتسبنا ازاي!!! حتى لو مشيت يا محمد -وده وارد جدا- هيفضل الوطن معانا بشكل او اخر
تحياتي
زيانور

فاتيما يقول...

أمول
أنا تهت
يا بنتى إيه كل ده
مخبياه جواكى
التيجان دى حاجة حلوة والله
كرسى الأعتراف المطهر ...
بصى أنا مستغربة ليه كنتى عاوزة تروحى السودان مع صاحبتك؟؟
أشومعنى السودان يعنى دا اللى ما حد فكر يروحها و يعمل رحلات ليها أصلاً
جاوبى عشان الجزئية دى دوشلى دماغى
و بعدين إيه حكاية تقابلى نفسك دى
أومال إنتى بتعملى إيه فى المدونات بتعاتك إن شاء الله
طب دنتى من الناس اللى بحس أنهم بيعرفوا يعبروا عن روحهم كويس قوى
آه صحيح مبتقوليش بإسلوب مباشر
أنا كذا
و عملت دا عشان أنا كيت ..
بس كل بوست بتكتبيه فيه حتة منك و من حياتك
تكونيش عشان حياتك مزدحمة و بتهتمى بالتفاصيل حاسة إنك تايهة و موش لاقيكى ؟؟
يمكن
بس أنا عجبنى التاج بجد
هوه جانى من ناس تانية
لكن أنتى حطتينى فى خانة اليك
و لازمن أجاوب بقى
البوست الجاااااى
تحياتى لنور و زياد و امهم القمر

د. إيمان مكاوي يقول...

عرفت عنك حاجات جميله ..ويارب تعرفي تلاقي نفسك كمان وكمان ..
هديتك جات في وقتها زوري المدونه وإنت تعرفي
شكرا جزيلا لك

Zianour يقول...

فاطيما حبيبة روحي.. المدهشة الجميلة .. خطوتك دي عزيزة عليا وبالنسبة للسودان دا كان مشروع جميل اننا ناخد القطر لحد الجنوب ونعدي منه للخرطوم ونكتب عن المشهد الطويل من القاهرة للخرطوم .. كان حلم جميل قوي وكان نفسي فيه قوي.. بس محصلش نصيب .. دا كان من 10 سنين كان ممكن ايامها تروحي السودان بالبطاقة الشخصية زي ليبيا كده والفكرة جميلة لان السودان بلد جميل على فكرة والمناظر الطبيعية روعة ووهم والناس طيبين جدا جدا جدا
انا صحيح رحت الاقصر واسوان من كام شهر مع العيال وابوهم وانبهرت اكتر بالاقصر .. الجنوب جميل جدا يا ميمي.. وعمق مصر وجذورها اللي لسه بشوكه ف الجنوب بجد .. لازمن تعملي الرحلة دي بس بالقطر مش بالطيارة...
بالنسبة لموضوع اقابل نفسي ففعلا المدونة ساعدتني كتير وانتي والناس الجميلة اللي قابلتهم روحيا ساعدوني كتير وانا اهدأ دلوقتي اصل اختك كانت من المفكرين المزمنين اللي الفكر عياهم بعيد عنك .. بس اكتشفت ان البساطة دواء برضه.. وانا بلاقي نفسي بشويش وفعلا اللي باكتبه حتت مني
حضونة كبييييييييييييرة قوي قوي
زيانور

Zianour يقول...

ايما : شكرا لمرورك ويا ريت التاج يعجبك.. منوراني

غادة يقول...

ازيك يا قمر
ياااه السودان و فرنسا مع بعض طب ازاى
انتى مريت بتجارب كتير اوى بس اجاباتك مفأجه بجد بس حلوه
انتى عارفه انا نفسى اشوفك انتى و نور و زياد اوى و ان شاء الله ربنا يديم عليهم الصحه وتلاقى نفسط والشمس تنور و اوعى تخلى نفسك يجلها اكتئاب
و انا هجرى اهه عندى اجاوب على اسئلة التاج سلام لأحلى ام نور وزياد

غادة يقول...

اه يا زيانور نسيت اقولك انا ميلى
onshoda@gmail.com
سلام يا قمر

Zianour يقول...

العزيزة نور..
فرنسا دي كانت منحة من المركز الثقافي الفرنسي.. والسودان كان حلم. اصلي غاوية سفاري وكده!!
وكان فيه فترة بدات الاطلاع على الثقافة الافريقية وانبهرت بجد.. بس للاسف مفيش تقريبا اي تراجم بالعربي او فيه وانا مقصرة ووقعت على كتاب صوفي ترجمته على فكرة - بس لسه قابع ف الدرج- غير كتيييير جدا من معاني السكينة والايمان عندي ...!!
وانا بقى هاروح اشوف التاج اهوه..
بوسات كتيرة
زيانور

د. إيمان مكاوي يقول...

حبيبتي zianour
الله وصلني حضنك ومشاعرك الصاقه ..أصلي مفتقده مشاعر الصداقه هنا في غربتي
وربنا يكرمك ..ويديم بيننا الحب في الله
نصيبك في التورته والورد والبيتزا محفوظ وكمان نصيب زياد ونور
تحياتي

rtrcbh يقول...

السلام عليكم ورحمه الله وبركاته
أسال الله أن يحقق لك كل احلامك وامانيك وان يبارك لك فى ابنائكم
والسلام عليكم

Zianour يقول...

دكتور ابا يحي : وعليكم السلا واهلا وسهلا بك

.:.-=- ELGaZaLy-=-.:. يقول...

كل دة!!!
التاج دة شئ هايل يا جدعان صحيح الواحد حضر مولد الافتكاسة دى ...

بس بتثبت انها نافعة بجد

دة الواحد ممكن من اجباتك يخرج الف قصة وقصة...
تعرفى انا كمان روحت فرنسا بس مروحتش السودان للاسف ولا ناوى قريبا يعنى

سعيد بالتعرف عليكى عن قرب

Zianour يقول...

شكرا غزالي على المرور.. ولو كتبت قصة يجب الاشارة الى الملهمة(:

مدونتك جميلة..

Asmaa mahaba يقول...

هههههههه حماتك
اتقى الله يا حماتى
واحشانى يا ام زياد
فينك
تحياتى ليكى سومه_87

Zianour يقول...

ايه ده هو حماتك مش اهم حاجة في حياتك ولا ايه؟؟
كده بقى ارجع ف كلامي ويا دار ما دخلك شر والواد يشوف له شوفة تانية!!!
راجعي نفسك وتوبي كده عما قلتي وإلا..
تحياتي ليكي ويا ريت تجاوبي على التاج
زيانور