انا حزينة ... على الوطن
أنا حزينة على متاجرة الاعلام الفج بجوع الناس
أنا حزينة على الزمن اللي خلى الناس بلا كرامة ولا ثمن
أنا حزينة ع الحق اللي ضايع وهو منور زي الشمس
انا حزينة عليك يا وطن..
عمري ما كلمتك يا مصر.. عمري ما قلت لك بحبك ولا حتى باكرهك
دلوقتي باقولك بحبك بس حب بطعم المرارة ..وباكرهك كره بطعم الندم ..
فين الكلام اللي ممكن يوَصف الاحساس .. واي كلام قيمته إيه امام الناس اللي ماتت واللي بتتهان واللي عاوزة بس مجرد تاكل عيش
وتمر حياتها بسلام مستورة من غير قلة كرامة ... وتندفن برضه تحت ترابك يا قاسية!!
هو ده كتير ... يا مصر والله والله لأعاندك واهاجر والله والله لاعاندك وأهج منك يا أمي.. يا ستر وغطى.. يا حنيَنة .. يا أمي
بس برضه..- آه يا نيَ- مش هانسى اوصيهم يدفنوني لما اموت تحت ترابك جنب ابويا وامي .. يمكن يمكن ساعتها تحنَي علي وتحضنيني.. يا قاسية قوي قوي يا امه..
هناك 4 تعليقات:
الله على الكلام
المختصر المفيد فعلا
كان نفسى مصر تحس بينا
بس الموضوع ده مش باديها
ده بإدهم هما منهم لله
تحياتى ليكى
و سلمى لى على نو و زياد
بوست رائع
أول مرور ليا فى مدونتك..بس بجد بوست جميل....أجمل ما فيه...إن كلامه بسيط ومباشر ويحمل كثيرا من البراءة التى فقدناها(بفعل الزمن)...تحياتى لكى وأرجو التواصل
مش معقول تعليقين مرة واحدة..!! الفقي بقى!!
يا مواطن اخجلتم تواضعنا والله ومش عارفة ليه حاسة انك من اصل طيب .. يعني اللي عندهم ام واب بركة كده من بتوع زمان.. ربنا يحميك
ويا واحد من البلد دي اشكرك على المرور وانا مريت قبلك عندك و اتكلمت براحتي يا ريت ما تزعلش بس والله فيك الخير يا مصر !!!
شكرا يا شباب
اه صحيح لو عاوزة عدد الزوار يزيد
فى رسالة بتتفتح قبل ما البلوج بتاعك يفتح
بتقول انه في البلوج ده
محتوى للكبار فقط
على مسئوليك لو دخلت
ــــــــــــــــــــــــــــ
الغيها عشان كل اللى داخل ميخفش من المحتوى
و يدخل عادى
إرسال تعليق