الأحد، 15 يونيو، 2008

نور وزياد

عايزة أكتبلكم
وصية
بعد رحيل
تفضل لكم..
.
عايزاها وصية
حساسة وجميلة
مليانة
ألوان نديّة
تبدر الفرح والنور
لخطاويكم..
.
وجنب كل لون
عايزة أحط
نجمة ووردة وصدفة
وشوية حب
وشوية غُنا..
.
وعايزة ف الوصية
اشكركم
لأن السعادة كانت ف داركم
بجواركم
مش ف الكتب
ولا المعارك
ولا سلم الفردية
اللي طالع بالبشر
وشارد..
.
وعايزة كمان اوصيكم
بالحب
وبالأشياء البسيطة
خليكم
بجوار أمنا الارض
- طينها
أو رملتها
او بحرها-
لأن فيها
الميزان
والحقيقة..
.
وعايزة فيها
أدعي لكم
وأدعي أكتر
تكون الدعوات مقبولة
نور ف طريقكم..
"يحميكم
ويهديكم
ويرضيكم
ويبعد عنكم
اللي يؤذيكم"..
.
وعايزة ف الوصية
اقول لكم
انتوا ابناء الحياة كلها
وهي فخورة بيكم
لانكم جبتوا الحياة
لينا..
.
وعايزة برضه
اطلب سماحكم
لقسوتي
أو تقصيري
او زعيقي
أو سوء فهمي
مرات
ليكم أو عليكم..
.
وعايزة أنهيها
بانكم
من كبدي خرجتم
وجوه قلبي هتفضلوا
ولو احتاجتوني
غمضوا
واركبوا
حصان خيالكم
- زي ما علمتكم-
هتلاقوني
في قلوبكم
- كما اتمنى-
.
16.05.2008